Dtjytyk

Kart over deltakarlanda i VM 1966

Frimerke frå Sovjetunionen i høve fotball-VM 1966

Verdsmeisterskapen i fotball 1966 vart avvikla i England i tida 11. -30. juli 1966. Kampane fann stad på åtte arenaer i sju ulike byar; London (Wembley og White City), Birmingham, Liverpool, Manchester, Sheffield, Middlesbrough og Sunderland. Vertslandet England vart verdsmeister etter å ha vunne 4-2 over Tyskland i finalen. Portugiske Eusébio vart toppskårar i turneringa med sine ni nettkjenningar.

Turneringsformatet var det same som i dei to føregåande VM-turneringane. Dei 16 deltakarlanda vart delt i fire innleiingsgrupper, og dei to beste laga i gruppene gjekk vidare til kvartfinalane. England, Vest-Tyskland, Portugal og Sovjetunionen vart gruppevinnarar og fekk fylgje av Uruguay, Argentina, Ungarn og overraskingslaget Nord-Korea. Tittelforsvaren Brasil rauk ut etter å ha tapt 1-3 for både Ungarn og Portugal.

Frå kvartfinalane tok alle dei fire gruppevinnarane seg vidare til semifinalespel. Portugal vann 5-3 over Nord-Korea i ein høgdramtisk kamp der nordkoreanarane valsa over Portugal og leia 3-0 etter 22 minuttars spel. Fire mål av Eusébio snudde kampen i Portugals favør.

Begge semifinalane enda 2-1: Vest-Tyskland sigra over Sovjetunionen på Goodison Park i Liverpool, medan Bobby Charlton skåra begge måla då England vann over Portugal på Wembley i London. Også bronsefinalen enda 2-1, her vart José Torres matchvinnar for Portugal to minuttar før fløyta lydde for full tid.

Gruppespelet |

Gruppe A |

#	Lag	K	S	U	T	Mål	±	P
1	England	3	2	1	0	4–0	4	5
2	Uruguay	3	1	2	0	2–1	1	4
3	Mexico	3	0	2	1	1–3	−2	2
4	Frankrike	3	0	1	2	2–5	−3	1

Gruppe B |

#	Lag	K	S	U	T	Mål	±	P
1	Vest-Tyskland	3	2	1	0	7–1	6	5
2	Argentina	3	2	1	0	4–1	3	5
3	Spania	3	1	0	2	4–5	−1	2
4	Sveits	3	0	0	3	1–9	−8	0

Gruppe C |

#	Lag	K	S	U	T	Mål	±	P
1	Portugal	3	3	0	0	9–2	7	6
2	Ungarn	3	2	0	1	7–5	2	4
3	Brasil	3	1	0	2	4–6	−2	2
4	Bulgaria	3	0	0	3	1–8	−7	0

Gruppe D |

#	Lag	K	S	U	T	Mål	±	P
1	Sovjetunionen	3	3	0	0	6–1	5	6
2	Nord-Korea	3	1	1	1	2–4	−2	3
3	Italia	3	1	0	2	2–2	0	2
4	Chile	3	0	1	2	2–5	−3	1

Finalen |

Lagkaptein Bobby Moore har teke mot Jules Rimet-pokalen etter VM finalen 30. juli 1966

Finalen vart spelt på Wembley stadion i London om ettermiddagen 30. juli med 97 000 tilskodarar til stades.

Helmut Haller gav Vest-Tyskland leiinga etter 12 minuttar, og Geoff Hurst utlikna fire minuttar seinare. Martin Peters sende England opp til 2-1 i det 78. minutt. Kort før ordinær tid var over, fekk vesttyskarane frispark. Etter frisparket greide sidebacken Wolfgang Weber å putte ballen over målstreken ved nærast stolpe. Ti minuttar ut i fyrste ekstraomgang sende Hurst av garde eit skot som trefte tverliggjaren og spratt ned på mållinja. Ballen vart dømt i mål, ei mykje omdiskutert avgjerd. I det 120. minutt, då publikum var klar til storme bana for å feire sigeren, skåra Hurst sitt tredje mål. Han er den einaste mannlege spelaren som har skåra tre mål i ein VM-finale i fotball. Kapteinen Bobby Moore kunne heve Jules Rimet-pokalen som prov på at England var verdsmeister i fotball.

Verdsmeistrar for England vart: Gordon Banks, George Cohen, Jackie Charlton, Bobby Moore (kaptein), Ray Wilson, Nobby Stiles, Alan Ball, Martin Peters, Bobby Charlton, Geoff Hurst og Roger Hunt.

Tysklands mannskap: Hans Tilkowski, Horst-Dieter Höttges, Willi Schulz, Karl-Heinz Schnellinger, Wolfgang Weber, Franz Beckenbauer, Wolfgang Overath, Helmut Haller, Uwe Seeler (kaptein), Sigfried Held og Lothar Emmerich.

Kjelder |

Bakgrunnsstoff |

• VM-finalen 1966