Dtjytyk

Uglitsj Углич
Byvåpenet til Uglitsj
Plassering
Styresmakter
Land	Russland
Føderasjonssubjekt	Jaroslavl oblast
Grunnlagd	937
Geografi
Innbyggjarar  - Totalt (2008)	35 427
Koordinatar	57°32′″N 38°20′″EKoordinatar: 57°32′″N 38°20′″E
Tidssone - Ved sommartid	MSK (UTC+3) MSD (UTC+4)
Diverse annan informasjon
Retningsnummer (tlf)	+7 48532
Nettstad: www.uglich.ru

Uglitsj (russisk У́глич) ) er ei historisk by i Jaroslavl oblast i Russland med om lag 35 000 innbyggjarar. Han ligg ved elva Volga, rundt 100 km vest for Jaroslavl.

Historie |

Dmitrijkyrkja (eller Blodskyrkja) i Uglitsj

Uglitsj vasskraftverk

Gjenoppstandelsesklosteret i Uglitsj (1677)

Ei lokal segn daterer grunnlegginga av byen til 937. Han vart først nemnd i skriftleg kjelder i 1148, som Uglitsje Pole (tyder Hjørnejordet). Ein reknar med at namnet viser til svingen i Volga like ved.

Uglitsj var sete for eit lite fyrstedøme frå 1218 til 1328, då dei lokale fyrstane selde rettane sine til storfyrsten av Moskva. Som ein grenseby for Storfyrstedømet Moskva vart han brend fleire gonger av litauarar, tatarar og storfyrsten av Tver.

Storhertug Ivan III av Moskva gav byen til den yngre bror sin Andrej Bolsjoj i 1462. Under styret til Andrej vart byen utvida og dei første steinbygningane vart oppført, mellom anna katedralen (ombygd i 1713), Forbønnsklosteret (øydelagd av bolsjevikane) og det raude teglsteinspalasset til fyrsten (fullført i 1481 og bevart til i dag).

Under styret til Ivan den grufulle gjekk byen over til den einaste bror hans, Jurij. Dei lokale innbyggjarane hjelpte tsaren med å ta Kazan, ved å bygge ei trefestning som vart frakta langs Volga heilt til Kazan. Heile 1500-talet var ei tid i framgang for Uglitsj både politisk og økonomisk, men så kom ei tid med tilbakegang.

Etter Ivan døydde vart den yngste son hans, Dmitrij Ivanovitsj, forvist til Uglitsj i 1584. Den mest kjende hendinga i byen fann stad 15. mai 1591 då den 10 år gamle guten vart funne død med strupen skoren over i borggarden til palasset. Mistanken fall med ein gong på hovudrådgjevaren til tsaren, Boris Godunov. Offisielle granskarar konkluderte derimot med at dødsfallet var ei ulukke. Dei skar ei «tunge» frå klokken i katedralen som hadde ringt nyhendene om dødsfallet til Dimitrij og «forviste» ho til Sibir.

Sidan Dimitrij var den siste ættlingen av det eldgamle Rurik-dynastiet, så førte dødsfallet hans til den dynastiske og politiske krisen kjend som urotida i Russland. Folk trudde villig vekk at Dimitrij var i live og støtta opp om fleire falske Dmitrijer (Falske Dmitrij I, Falske Dmitrij II, Falske Dmitrij III) som prøvde å ta over trona i Moskva. Under dei urolege tidene omleira polakkane Aleksejevskij- og Uleima-klostra, brente dei til grunnen og tok livet av alle som hadde søkt tilflukt der.

Dmitrijkyrkja frå Volga

Romanov-tsarane prioriterte å få kanonisert den martyrdrepne tsarevitsjen og å gjere Uglitsj til ein pilegrimsstad. På staden der Dimitrij hadde vorte myrda bygde byen i 1690 den vesle men vakre Dimitrijkyrkja (eller Blodskyrkja), som dukkar opp i horisonten med raude veggar og blå kuplar når ein seglar nordover på Volga. Palasset der prinsen budde vart gjort til eit museum. Biletet av tsarevitsj med ein kniv i handa vart nytta som emblemet til byen.

I den første tredjedelen av 1700-talet vart kreml-katedralen og dei merkverdige klokketårna rive og bygd opp att. Andre landemerke frå 1700-talet er Smolenskaja-, Korsunskaja-, Kazanskaja- og Bogojavlenskaja-kyrkjene. Den viktigaste bygningen frå 1800-talet er katedralen i Epifaniklosteret, innvigd i 1853.

På 1930-talet medførte avgjersla til Stalin om å bygge Uglitsj-reservoaret til alvorleg flaum i utkanten av byen.

Økonomi og næringsliv |

Industrien i byen består i maskinbygging, treforedling og møbelindustri. I byen ligg òg ein jernbanestasjon og eit vasskraftverk. Byen hadde tidlegare òg ein kjend fabrikk for armbandsur kalla Chaika, som no er nedlagd.

Attraksjonar |

Bortsett frå i kremlen i byen så har Uglitsj òg andre flotte døme på gammal russisk arkitektur. Verdt å merke seg er Aleksejevskij- og Gjenoppstandelsesklostra.

Den tre-spira Maria Himmelfartskyrkja (1628) i Aleksejevskijklosteret vert rekna som ein juvel innan russisk mellomalderarkitektur. Like ved ligg òg den meir konvensjonelle Johanneskyrkja (1681).

Nærare breidda til Volga kan ein sjå Gjenoppstandelsesklosteret med den enorme katedralen, refektorium, klokketårnet og sommarkyrkja. Alle desse bygningane står på rekke og er datert til 1674-77. Vis-a-vis klosteret ligg Johannes Fødsels kyrkje. Ho vart bygd i 1689-90 av ein lokal handelsmann for å minne staden der sonen hans hadde drukna.

Bakgrunnsstoff |

• 
  Uoffisiell nettportal for Uglitsj (russisk)


• 
  Uglitsj på MojGorod (russisk)

Kjelder |

v • d • e Byar i Jaroslavl oblast
Administrativt senter: Jaroslavl
Danilov · Gavrilov-Jam · Ljubim · Mysjkin · Pereslavl-Zalesskij · Posjekhonije · Rostov · Rybinsk · Tutajev · Uglitsj

v • d • e Den gylne sirkelen i Russland
Aleksandrov · Bogoljubovo · Gorokhovets · Gus-Khrustalnyj · Ivanovo · Jaroslavl · Jurjev-Polskij · Kideksja · Kostroma · Moskva · Palekh · Pereslavl-Zalesskij · Pljos · Rostov · Sergijev Posad · Suzdal · Tutajev · Uglitsj · Vladimir